Nel actu cellebráu nel Puertu Tarna, rindióse homenaxe a la Declaración de Soberanía del Conseyu d’Asturies y Llión reivindicando’l so caláu hestóricu y la so proyeición de futuru.
Fotografía: Andecha Astur
L’actu entamó reivindicando la trescendencia hestórica d’esta declaración pola qu’Asturies s’independizó de la República española, denunciándose la traición hestórica del PSOE, que fo’l principal protagonista d’aquellos fechos, y qu’agora ye ún de los mayores enemigos del Pueblu Asturianu, y reclamando al conxuntu del asturianismu políticu la necesidá de vindicar y comprometese con esta parte tan importante de la hestoria d’Asturies.
Darréu, intervino David Rivas, que fexo un repasu a la declaración de Soberanía, a la so aplicación práutica con fechos talos como la nacionalización de la industria, la emisión de sellos y moneda propio o la solicitú d’integración comu miembru de plenu drechu na Sociedá de Naciones (predecesor de la ONX). N’opinión del mesmu “hai tres momentos cimeros na hestoria d’Asturies: la proclamación del Reinu asturianu, la declaración de soberanía de 1.808 y la de 1937, y nun podemos permitir que se sigan escaeciendo”.
Pero les intervenciones nun se llendaron al meru recuerdu hestóricu, sinon que sirvieron de puntu de sofitu pa reclamar la Soberanía d’Asturies como una necesidá vital pa la so supervivencia, denunciando cómo l’usufructu que de la mesma fai l’Estáu español ta llevando al nuesu país a una situación de precariedá nacional, social y cultural, y reclamando un esfuerciu al conxuntu de los asturianos p’alcontrar puntos comunes de magar los que llevar alantre un proyeutu soberanista con posibilidaes de torgar les polítiques del Estáu español sobro la nuesa tierra.
Fuente y más info: http://www.andecha.org/
