Diccionariu Llionés de Nicolás Bartolomé Pérez ye la primer parte d’un diccionariu bidireccional llionés–castellanu / castellanu–llionés.
Hoy sábadu, 29 de diciembre de 2018 a las 19,00 h., tendrá llugar nel Ateneo Varillas (C/ Varillas 3) de la ciudá de Llión la presentación del Diccionariu Llionés. Volume I: llionés-castellanu, obra de Nicolás Bartolomé Pérez.
El Diccionariu Llionés. Volume I: llionés-castellanu, de Nicolás Bartolomé Pérez, ye la primer parte d’un diccionariu bidireccional llionés–castellanu / castellanu–llionés. La obra cuenta con cerca de 11.000 entradas categorizadas gramaticalmente, y más de 20.000 equivalencias castellanas.
Amás d’una rigurosa selección del léxicu patrimonial, el diccionariu incluye neoloxismos, cultismos y préstamos d’outras llenguas axustaos a la fonoloxía y ortografía del llionés, incorpora observaciones sobre gramática y ortografía, exemplos d’usu, indica áreas de conocimientu de los términos que lo precisan (agricultura, botánica, dereitu, metereoloxía, zooloxía, etc.) y la identificación de los seres vivos cono sou nome científicu.
El diccionariu ye respetuosu cona pluralidá lingüística del llionés, pues xunto conos lemas que se proponen cumo referenciales tamién recueye variantes y xeosinónimos de las principales variedades del idioma. Señala relaciones semánticas de sinonimia, antonimia y afinidá de muitas palabras, rexistra abundante fraseoloxía, locuciones y modismos patrimoniales, asina cumo numerosos refranes populares llioneses.
El Diccionariu Llionés ye una ferramienta imprescindible pa la consulta, deprendizaxe y usu de la llengua llionesa.
A lo llargo de la presentación, intervendrán Nicolás Bartolomé Pérez (autor), Fernando Álvarez-Balbuena (prologuista), Pedro Moreno (editor) y Xairu López (maquetador).
Ya a la vuesa disposición la guía d’usu y consulta de la obra qu’en poucos días podréis atopar tódalas llibrerías de referencia.
Fecha de inicio: 29-12-2018
Fecha fín: 29-12-2018
Lugar: ateneo varillas
19,00 horas
